Syt iber fümf Joorzäänd e feschte Bestanddeil vo dr Basler Fasnacht

Syt unserer Grinding im Joor 1975 lääbe und liebe mir die einigartig Atmosfääre vo de drey scheenschte Dääg - mit voller Liideschaft, mitrissender Muusig und ere grosse Porzion Härzbluet. Was damals mit ere glaine Gruppe fasnachtsbegeisterte Mensche aagfange het, isch iber d Joor zunere lebändige und viilsitige Guggemuusig worde, wo hyt us iber 40 Mit- und Ohniglieder bestoot.

Aber unseri Gmeinschaft läbt nit nur wäärend de Fasnachtsdääg. S ganze Joor duure prääge gmeinsami Erlebniss, musikalischi Uuseforderige und unvergässligi Moment unsers Vereinsläbä. In regelmässige Proobe fiile mir an unserem Zämäspiil, iebe neie Stüggli ii und bereite uns gmeinsam uf die kommendi Fasnacht vor. Dodrbii stönd nebe Rhytmus und Prezision, vor allem d Freud an dr Muusig und d Gmeinsamkeit im Mittelpunggt.

Bsunders usem Vereinsjoor usezhebe isch unser Proobewucheend, an dem intensiv musiziert, glacht und gfiirt wird. Do waggst die Gruppe jewiils no enger zämä und d Friindschafte wärde gläbt und pflägt. Natirligg gheert au d Vorfasnachtszit mit wäggselnde Vorfasnachtsevent, de Marschproobe und dr Uusgraabig  zu de Höhepünggt vom Vereinslebe. Au dr traditionell Bummel nach dr Fasnacht gheert fescht zu unserem Jooresprogramm - e Gläägeheit, zämä abzschalte, witeri Erinnerige z schaffe und dr Abschluss vo dr Fasnachtssaison z gniesse.

Mir liebes, Mensche mit unserer Muusig z begeistere und die bsunderi Stimmig vo dr Basler Fasnacht witerztrage. Jede Uftritt isch für uns e Glägäheit, unseri Liideschaft mit andere z teile und Unvergesslichs z schaffe.  Mir biete e Ort vo Woolsyy an dem sich ä Jedä und ä Jedi willkomme fiele ka - unabhängig vo Erfaarig oder musikalischem Kenne. Ob Aafänger, langjeerigi Fasnächtler oder erfaareni Muusiger. Bi uns findet jedi Person ihre Platz. Denn mir sind iberziggt, dass e Guggemuusig nit nur vo de Ten läbt, wo gspielt wärde, sondern vor allem vo denä Mensche, wo si gmeinsam erklinge lend.